[poem=font="simplified arabic,6,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
دايم على البال... لو غبتي عن انظاري...=يا من كتبتي لي... ان الحب له معنى
وان العلاقات نور... وجورها نارِ...=وان الظروف اثقلت كاهل تواضعنا
وان الرُبَا تشتكي من شحّ الامطارِ...=رغم ان صوت الرعود اصمخ مسامعنا
يا كبر هَمِّي... ويا طوله ومشواري...=ويا كثر ناسٍ تواعدنا... وتخدعنا
انتي تشوفين بعض احيان تكراري...=للحزن ، والهم ، وافكارٍ تروّعنا
لا شك حزني طغى... في معظم اشعاري...=لكنّ هذي نتايج أمر واقعنا
اللي فرض نلتقي من خلف الاسوارِ...=حتى وأد حلمنا في صغره... وضعنا
ملَّيت الملم جروحي... واعزف اوتاري...=واجُرّ موال... ذا عنَّا ، وذا معنا
تعبت اسامر نجومي... واحبس نهاري...=وارسم على لوحة الايام طابعنا
وطيت جمر الفراق... بقوة اصراري...=مع ان سيف النَّوى... يقتل مطامعنا
موجك هزم عنفواني معك ، وابحاري=ضد اتجاهات ريح اشواق تدفعنا
انتي تقولين يا صـــادق وش الطاري...؟!=يومك تغيب... وتنقض في مواجعنا
وانا اكتم الشوق... لاجل رضاك وآداري...=حتى هبوب الشمال أيبس مرابعنا
مرَّيت كل الدروب... ولكن اقداري...=ضاقت برحب الفضا اللي كان واسعنا
الحب لاجله كتبت عصارة افكاري...=رغم ان حكم القدر... بالوصل مانعنا
سرقت نفسي... من احساسي وهو داري...=وارسلت لك... كيف نحيا من توادعنا !
عزيزتي : لو جمعنا كل الاعذارِ...=ما اظن درب اللقا في يوم يجمعنا
ظرفي يبرِّر وحوشة ليلي الساري...=وظرفك نزف جرحنا... وارخى مدامعنا
[/poem]