تويت
لا تفصّل من قماش الهمّ ثوب ،،
ولا تخيّط لك من الضيقه عباه
الاماني شيك في كل الجيوب ،،
والطموح الدَين والعمر الزكاه
من يخاوي الوهم والحظ الكذوب ،،
ف الدروب الكايده يفقد عصاه
شفت شمع الحلم في لحظه يذوب ،،
وشفت ليل الفكر ما يكمل مساه
مثل نور الشمس في ساعة غروب ،،
كل راعي حلم ينظر في سماه
لآهو اللي قَدْر من ذنبه يتوب ،،
ولآهو اللي رد للشمس اتجاه
ان سألته عن مراده قال ..دوب ،،
ولو سألته عن طموحه قال .. هاه
أثَّرت فينا ثقافات الشعوب ،،
واثَّرت فينا كتابات الغواه
لين صرنا م الشمال الى الجنوب ،،
نتْبع العالم على غير انتباه
فيس بوك وواتساب ويوتيوب ،،
والتويتر كلنا نطرد وراه
شخص يتفلسف وللحكمة كَتوب ،،
وشخص ن يمارس على الناس الوصاه
وشخص يتغشمر ومرتاح وطروب ،،
وشخص ندري كلنا وش مبتغاه !
وكلهم ذولا من الواقع هروب ،،
وكلهم ذولا معانين ولهاه
انشدك بالله يالصدر الرحوب ،،
كيف تتحمل سواليف السفاه
كيف تتعامل معا وجهه ن شحوب ،،
كل همه قال ذاك وقال ذاه
كلنا زلات واخطاء وعيوب ،،
وكلنا مخطين وحفاه وعراه
وعندنا سيات وآثام وذنوب ،،
وعندنا تسويف ما نعرف مداه
لآ متى نبغى نتوب و مانتوب ،،
ولآ متى واحنا نأخر في الصلاه
الرجاء بالله علام الغيوب ،،
الله الواحد ولا نرجي سواه
ينزل الرحمه على كل القلوب ،،
ويلطف ب عبده ويغفر له خطاه
تعليق