[poem=font="simplified arabic,6,blue,normal,normal" bkcolor="transparent" bkimage="backgrounds/15.gif" border="groove,4,sandybrown" type=1 line=0 align=center use=ex num="0,black""]
ياغربة العمر والدنيا محطة قطار=من بعضنا البعض تاخذنا ولا أدري لــ وين
والأمتعه حفنة أحلام وأماني كثار=وآجآل تلعب بها الأقدار بين اصبعين
شفنا وعفنا ولاخلف لنا الانتظار=إلا التوجد ..وغصّات الندم.. والأنين
والواقع المرّ يكشف من ردآه الستار=على نزيف الجروح وخيبة الآملين
أكبر خطانا رفعنا للسماحة شعار=لين استلذت بطعنات القفا لَ الاقربين
وأصغر خطانا تعاملنا بحسن الجوار=مع جاهل يشوفنا لامرّ من نص عين
ربي خلقنا كبار ومن سلالة كبار=لكننا مانقلل قيمة الآخرين
والطيب والمرجلة لو هي حصر واحتكار=ماكان كلٍ يقول آنا وأنا ياذهين
ياصاحبي لي سنين أسعى لفك الحصار=حتى يبدد ظلام الشك فجر اليقين
علاقتي في تصنّع ضحكي المستعار=علاقة الآآآآه في نبرات صوت الحزين
كني غريم السهر والليل طلاّب ثار=يقول عثرة خطاك تحين لو بعد حين
عن هيبة البشت ومقابل طوال العمار=يكفيني آكون ضمن القلّة المبدعين
اللي بنان اليدين تشير له بإفتخار=ويقال ذا يستحق إصغـاية السامعين
أحيانآ أوقف على اطلال ونوادر نزار=لاغثربوا جمّة أهل الشعر مستشعرين
وأحيان أشوف الفضاء راسي وفكري مدار=سهيل في مدهلة والجدي والفرقدين
وأتبع هوى النفس وانسى في خضمّ الغمار=إني مجرد بشر مخلوق من ماء وطين
أسالك يارب لاتجعل لنفسي خيار=عن نور هديك وسنّة سيد المرسلين
واعصمني من التبجّح بالمعاصي جهآر=ومدة يدي قايلٍ لله يامحسنين
واللوم يلحقك ياراسٍ كساه الوقار=إلئ متى وأنت في سرداب جهلك سجين
تناقضاتك تورّث في النفوس احتقار=لأفعالك اللي تخالف منهج الأولين
وإن قلطوك النشاما للشحم والفقار=من الطماعة تسابق بالشمال اليمين
لكن على طاري آسف.. وفّر الإعتذار=ما أنته بمعذور لو تشوف عذرك سمين
كثر الخطا يعتبر بوابة الإنكسار=للي خرج من فرح دنياه صفر اليدين
صحيح للعذر بعض أحيان رد اعتبار=لكن ماتبري المجروح قول آسفين

[/poem]