تقول جدتتي دايم هالبيت وفي مواقف معينه ..سالتها عن سالفته بحكم اني هاليومين جالسه انبش معها السوالف القديمه
تقول جدتتي :
كان فيه رجال متزوجن له مره معروفه بالزين ..وكانت ساكنه عند امه المهم في مره من المرات كان فيه زي العزيمه ويوم راح لها الرجال وتعشى وخلص خذا معه قطعه لحم وحطها بجيبه وراح للبيت ولما دخل الشق كانت امه وزوجته نايمين راح لزوجته وصحاها وقالها قومه جبت لتس هاللحيمه ابيتس تذوقينه المهم حرمته قامت وقالت: عطيت امك ..قال هو لا ..قالت طيب وكلتها..
قام الصبح مالقي زوجته ..
راح لاهلها يبي يرجعها قالت مارجع مع الي مايبر بامه ..مارجع معه ..
وبعد الوسايط والزحمه ..مانفع ..طلقها
وصار يجيها خطاب كثيير وكان شرطها تبي بيت لحالها وان مايكون له ام وابو ..او ماتسكن معهم
وكان لما يقبل هالشرط ترجع تهون تقول لا ..
لين جاها واحد كان وحيد اهله ويوم شرطت عليه قال هالقصيده ..
أشوف مسلوب الحشا مرسلٍ لـي
..........رسالةٍ تجعلنـي أصخـي بفَرقـاه
إن كان ما صيـد الحبيّـب تغِلّـي
........ما أقبلك يالمرسول لا أنت ولا ايّاه
أمّي ليـا شافَـت زولـي تهَلّـي
.........وألاّ الغضي لا شاف غيري تَحَلاّه !
ما أنسى سِنينٍ ديدَها سِقمـةٍ لـي
..........وأركب على المَتنَين وأقول يا يـاه
دَور السِنة وبطنَهـا حِجـرةٍ لـي
............البَرْد ما أشوفه والحَر مـا أدنـاه
أمّي وأبوي ما لهـم غيـر ظِلّـي
.............ومِن دَوّر الظِل يـا تـرف يلقـاه
الوالدَيـن لهـم بقلبـي مَحَـلّـي
............مَعروفهم طول الأيّام مـا أنسـاه
ويوم سمعت هالقصيده وافقت على طول وقالت ان هالشرط مجرد اختبار ..
وكان شرطها ..فايدتها ان لما يكون الرجال بار باهله سبحان الله يصيرون عياله بارين فيه ويبرون فيها..
لما دورت القصيده عند العم قوقل لاقيته بصيغه وقصه غير عن الي قالته جدتتي..
[] وانا اكتب جدتتي تقول اكتبي زي مااقولك عاد هي كلامها بالحييل بدووي واستصعبت اكتبه []
تعليق