قصيده رائعه تتكلم عن حالنا بالوقت الحاضر وتصفها وصفاً دقيقاً أترككم مع القصيده....ولو أنها طويله شوي بس أنها تستاهل الظاهر أن القصيده لشاعر أسمه ظافر الحبابي بس ماني مـتأكد...


يالله وأنا طالبك تغفـر لـي ذنوبـي يـا غفـور
أرجيك والجا لك وأنـا سالـك وأعيـد المسألـه

لوما تطهرنـي بعفـوك مـا تطهرنـي البحـور
جيتـك وذنبـي قـد تعـلاّ غاربـي يـا مثقلـه

أنا من الطين أنخلقت , أخطي ولا نيـب معـذور
قامت علـي الحجّـه بدعـوة رسلـك المرسلـه

مؤمن بتوراتـك و إنجيلـك و مؤمـن بالزبـور
و بسنّـة محمـد وآيـات الكـتـاب المنـزلـه

لكن خُدعت بزخـرف الدنيـا وزادتنـي غـرور
أبدت مفاتنهـا و ورتنـي مـن العمـر أجملـه

طبعاً بما إني بنـي آدم حصـل منّـي قصـور
وأذنبت يـا مـولاي ذنـبٍ بالخفـى مـا تجهلـه

أسألك تغفر لي و تستـر موقفـي يـوم النشـور
أليا ألقفـت خلقـك صحايفهـا وهـي مستذهلـه

من يستلمها بالشمال أفلـس وهـو يدعـو ثبـور
ومـن يستلمهـا باليميـن أفلـح لخيـر المنزلـه

وأسألك يا ربـي تعاونّـي علـى نيـل الأجـور
أحيا حيـاةٍ مكسبـي فيهـا مـن البـر أفضلـه

وأسألك جاهٍ مع هـل الدنيـا وحـظاً مـا يبـور
أيضاً وعرفٍ مـع هـل الحكمـه ورزقٍ تكفلـه

من لا تهيّـا لـه مقـامٍ مـع طويليـن الشبـور
يبكي على ما ضاع من عمـره وخيبـات عملـه

وان شاب راسه لا ترجّى فيـه تجبيـر الكسـور
لا خير فـي تالـي زمـانٍ مـا تغانمـت أوّلـه

ومانيب ناسي قصةٍ صـارت وأنـا أزور القبـور
لا زلـت أفكـر فـي غرابتهـا وبالـي تشغلـه

ساعة ظهر لي شايبٍ له حول قرنيـن محجـور
في جوف قبرٍ عن هـل الدنيـا طـواه ويعزلـه

سلّم وجا صوبي يقول : أبنشـدك يلـي تـزور
عن حالة الدنيا وعن وضع الزمـان وعـن هلـه

أنا مضى وقتي ومرّت بـي طويـلات الدهـور
والباقـي بعمـري بعيشـه بينكـم وأستكمـلـه

قلت : الزمان اللي يبارينا علـى خبـرك يـدور
الوقت نفسـه مـا تغيّـر ماشـيٍ فـي جدولـه

أما البشر , , , لا والله إلاّ غير من حـد الجـذور
صار انتقـالٍ مـن يميـن إلـى يسـار المنقلـه

استغرب الشايب من اللـي قلـت وبليّـا شعـور
حط اليمين أعلى الشمـال وخاطـره فيـه أسئلـه

قال : افتني عن حالة الشيبـان والشيـخ الوقـور
أهل الخبر والرأي والحكمـه وضـرب الأمثلـه

القدوه أصحاب الأمور اللي تطـاع بكـل شـور
اللـي يفضّـون النـزاع ويحكمـون المشكـلـه

قلت : البعض منهم على ما قلت في وصفك وقور
قدوه ولكـن رأيهـم مـا ينفـرض فـي مسألـه

الطاعه العميـا بقـا منهـا مجاملـة الحضـور
اللـي تلاقيهـا مـع أوّل فـرصـةٍ متنصّـلـه

والبعض لا عبـدٍ يخـاف الله ولا عبـدٍ شكـور
لا زهّـده شيبـه مـن الدنيـا ولا هـو جمّـلـه


بهيمةٍ يرجـع علـى منحـاه الأوّل ومحصـور
فـي لعـب بيلوتـه وريـح زقارتـه ومعسّلـه

والبعض الآخر شابت رموشه على درب الفجـور
ينقـل جـوازه للسفـر مـن مزبلـه لا مزبلـه

أشيمطٍ زانـي قضـا عمـره بحانـات الخمـور
والعايلـه ورعٍ يغـرّر بـه وبـنـت مهمّـلـه

قال : افتني عن حالة الخفرات ربّـات الخـدور
اللـي تصـان ببيـت عايلهـا و بابـه تقفـلـه

شيهانةٍ تشمخ عفاف وتصقـل فـروخ الصقـور
بين الفريـق ببشتهـا الضافـي وثـوبٍ تسبلـه

قلت : العـذارى فـي زمنّـا ببغـاوات الطيـور
تقليد هرج و عـرض ريـشٍ خلفهـا تستخملـه

تلبس عباةٍ ضيّقت حـول الردايـف والخصـور
فضيحةٍ تكشـف جسدهـا مـن علـوّه ليا أسفلـه

وموضة شيالٍ تكشف الوجنات وألـوان الشعـور
والمحـرم تبـدّل بـجـوالٍ بيـدهـا تحمـلـه

لا فوّحت صفر الدلال ولا عرفت غـش القـدور
تطبـخ لـهـا خـدّامـةٍ بالعايـلـه متوكـلـه

الأم ما صانت عفاف البنت من عمـر الزهـور
والأب ديّـوثٍ تحكـمـه حـرمـةٍ مسترجـلـه

وشلـون يتربّـى عيـال أم التبـرّج والسـفـور
إلاّ خنـازيـرٍ دمـاهـا بـــارده ومغـفّـلـه

قال : افتني بحال الشباب الصلب صيّاد النمـور
الفـارس اللـي ينطـح خصومـه بزنـدٍ يفتلـه

الوافي الشهم الغيور اللي لعـرض الجـار سـور
البار عنـد أمّـه وأبـوه وعلـم ربعـه يشغلـه

قلت : الشباب بوقتنا وجهه مثـل بـدر البـدور
والجسم من زود الرخا ما تنفتـل فيـه عضلـه

قصّـة شعـورٍ صيّرتهـم لا إنـاث ولا ذكـور
والثـوب راح ولا بقـى إلاّ عـالـمٍ متبنطـلـه

ناسٍ ( فلنتينو) وناسٍ تلبـس(كرستانديور)
صـار التنافـس بينهـم فـي لبسهـم والجنتلـه

من كان يشرب من قرار البير مشروبه (بيور)
والبل راعيها غـدا يشـرب حليـب(النستله)

ما منهم اللي قام دون أعـراض جيرانـه غيـور
من قام قالوا , , وشملقّـف حضرتـه ؟ وشدخّلـه

والوالدين حقوقهم ضاعـت وعنهـم فـي نفـور
أن غـاب عنهـم لا تذكرهـم ولا جـاه الولـه

بدّا عليهم شلّـةٍ تهـوى الوطـا بيـن الجحـور
لو تعزله عنهـم تبـي لـه شـان كنّـك تقتلـه

ما راح يوم يشارك ربوعه بحـزن ولا سـرور
حتى ابن عمّه يعرفـه بالوجـه واسمـه يجهلـه

بدّل حكاه وضيّـع سلومـه وحالـه فـي دبور
وأن شاف ضيف يخش حتى انّه يفـارق منزلـه

ناظر لي الشايب بعيـنٍ تجمـع السبـع البحـور
يقول : أنا لا يمكـن ادخـل مجتمعكـم واقبلـه

أنتو لكم وقتٍ تصـدّع مـن بلاويـه الصخـور
ما يقعد الجمّال به ساعـه ولـو ضـاع جملـه

أتمنى تكون القصيده نالت على إعجابكم
تقبلوا تحياتي
ودمتم بخير