من اجمل المدونات
الله يعطيك العافيه

الله يعافيك يابو سعيد وتسلم ياغالي

.


اليوم حاكت خيوط الشمس ثوب ٍ جديد
يا عامنا المنصـرم بحلامنا .. وش يليك

يالله عسى عام خير وفيه نصراً ..اكيد
نصر لجنود الوطن .. ياربنــــا نرتجيك

يا مالك الملك يا من فوق عرشه وحيد
ما احد ٍ ينــازعه في ملكه ولا له شريك

نطلبك يارب .. تجمعنا .. براي ٍ سديد
واخذل هل الكفر واهل الزندقه يامليك

في كل عـام ن تعيد اعوامنا وش تعيد
بالعــز بالمجــد لا والله ما اكذب عليك

العــز وقتــه مضى والمجد مجدن تليد
انظــر بعينك وقلّي ناظـرك وش يريك

ليه اتعامى عن الطاعه وشـوفي حديد
ليش اتحررص على الدنيا وموتي وشيك

يا عبد دنيـاك / عيش اعمى وحسك بليد
لا لا تعذر بعيب الناس .. والعيب فيك

دامك تطيع الهوى والنفس فيما تريد
ابليس والنفس لدروب الخطا تغتويك

الغي ماهــو حزامـك فـ النهـار الشديد
والعز ما هو بعـز امما بنـــو ســاعديك

اما على الساس تبني كل صرح وتشيد
ولا تهــاوت علـى راســك وتبت يديـك

انظر قلوب العدا .. كم هي علينا تكيد
احزاب وابليس معهم في النوايا يحيك

الحوثي اصغـر ذنب لاشك يرمي بعيـد
والرافضه ترسم الخطـه بخبث وتجيك

يا طاغية سوريا .. ربي بفعلك شهيد
تبطش وتقتل نفــــوس لربها تشتكيك

هذا زمــان الفتن فيه المشـــاكل تزيد
تمشي بدرب السلامه والفتن تحتديك

عبدالله سليمان .. 1/1/1440


.

.


ياجميل المحيا ليت قلبي يتوب
عن دروب المحبه والعنا والعذاب

الهواجيس تبني من خيالي ضروب
كل ما جال فكري فوق هام السحاب

اتخيلك دمعه فوق خد الغروب
واتاملك بسمه دونها الفين باب

الخيالات تبقى والاماني تذوب
والمشاعر تترجمها لصدر الكتاب

ليت ما بيني وبينك ديار وشعوب
لجل يرتاح قلبي من كثير الغياب

الهوى والمحبه من عذاب القلوب
سعد من صك بابه عن بلاها وتاب

ياحبيبي غزانا الشيب من كل صوب
صح بالشوف شايب بس قلبه شباب

عبدالله سليمان


.

.


بالله يهل الملاااامه .. لا تلووموني
ما ينفع اللوم قلب مفارق احبابه

خلوني ابحر مع الاشواق خلوني
الشوق غلاب يامن تجهل اسبابه

امواج صدري تغير .. وتبحر عيوني
والفكر طير ٍ .. يخم الصيد مخلابه

وش حيلتي لا ذكرتي وهاضت شجوني
إلا أنظم ابيات شعري .. واتسلى به

مادام شح الزمان .. وخابت ضنوني
فالصاحب اللي تناسى عشرة اصحابه


عبدالله سليمان

.

.


الله من ذكرى .. زمان ٍ مضى لي
ذكرى وليف ٍ غاب عني ولا عاد

يلوح لي طيفه واهوجس والآ لي
اسهر مع الهاجوس والشوق وقاد

واحيان اصد الناس واجلس لحالي
اخشى يلاحظني عذول ٍ ونقاد

وان قلت بسلى عنه ماني بسالي
طيفه على طرق الهواجيس معتاد

ودي لو امسح صورته من خيالي
وارتاح من كثر العنا .. والتوجّاد

مير البلا في القلب .. يصلاه صالي
عزآآه يا قلب ٍ نهيته .. ولا فاد

يالله عسى .. في مقبلات الليالي
صدفه تجمّعنا على غير ميعاد

عبدالله سليمان


.

.


اوزنجول .. 12/10/1439

وصلنا وكان الجو ساحر في اوزنجول
وكل الحضور بروعة السحر مذهوله

جمال الطبيعه شي بالوصف مو معقول
عن الوصف تغني صورة ٍ عنه منقوله

بدت للنظر غاده وثوب الحسن مشغول
تمخطر بعين الضيف من لحظة وصوله

خلاصة جمال الكون في ثغرها المجمول
تداوي نفوس ٍ .. من عنا الوقت معلوله

جلسنا ثلاث ايام نصطاف عرض وطول
مناظر تشد النفس .. والنفس مجبوله

وجينا على آيدَر .. مع الغيم والهملول
يرافق خطانا الغيم ويرش .. هملوله

نَهَرّها لنا يجري .. وشلالها مرسول
واهَلّها تجيب الضيف باخلاق معسوله

جبال ٍ خضر وجنان في روضها محصول
على الدرب نشري من ثماره ومحصوله

وصحن الفواكه فوق متن الصبي محمول
يبيع الجواني .. والمحاصيل من حوله

وجينا على حيدر نبي عقبها .. سيرجول
وطفنا المدينه كلّها .. بآخر الجووله

عبدالله سليمان

.

......

.


اقراء بيوت الشعر .. يا كل شابح
وارسله للي ماخذ الغي ناموس

احدن يصاررخ .. في القناه وينابح
واحدن يثرثر فالمواقع ومدسوس

اللي ذبحه الحقد .. والحقد ذابح
واللي يبيع اخلاقه بحفنة فلوس

مسكين لخونجي في الوهم سابح
والرافضي قلبه من الحقد محموس

سلاحهم .. هرّج الردى والمقابح
متربيين على الوساخات ونجوس

واحنا فعول .. وسيف الامجاد رابح
سيفن بريع ولمحته تقطع انفوس

سلمان لجموح المعادين .. كابح
يكبح جموح الشر ويدوسهم دوس

نسير واذناب .. المجوسي تنابح
اذناب والاذناب ماهمّت الروس


عبدالله سليمان


.

.


صوبت قلب المعنى .. نظرة العين البريه
والعيون الزايغه ماصوبت قلب المعنى

والله اني ماهويت من الورود إلا الطريه
غصنها لاهب نسناس الهوى قام يثنى

شاقني بر الحجاز .. من الظهاره للحويه
ليتنا نلحق على موسم حصاده وانتجنّا

له بعيني منزلن عالي .. وله فالقلب نيه
من يبلغه السلام .. ويخبره بالعلم عنّا

عبدالله سليمان


.

.

يا جميل المحيا .. اسعد الله صباحك
واسعد الله صباح اللي بقربك عشير

السعاده بقربك والونس في مزاحك
والذي فيك يتصبح .. تصبح بخير

ليت من طار بك في عصمته واستباحك
اشهد انه حظيظ .. اللي بقلبك يطير

عبدالله سليمان

.

.


ياطويق الجزيره ما يحركك نود
دام ساسك متين وهامتك عاليه

ماتهزك رياح وفي شموخك صمود
لو عواصف دعاة الشر .. متواليه

ابتسم ياطويق ولايهمك حسود
فوق ضلعك تموت احلامه الباليه

ارس فالارض واشمخ للسحابه وزود
لو قلوب العدا من وقفتك صاليه

الذكا والزعامه ورثك من الجدود
والسجايا الحميده فيك متتاليه

كرّم الله يداك وخاب ظن الحقود
جا يمللي يديه وعوودت خاليه

كلنا دون حدك .. ياوطنا جنود
نحرسك والشهاده سلعة ٍ غاليه
عبدالله سليمان

.

.

موتو قهر موتو قهر
بحقادكم طول الدهر

اسم السعوديه سما
وحدودها خطن حمر

يابواق الاحقاد انبحي
لين المراره .. تنفجر

من سوريا من تركيا
ومن الحكومه في قطر

ما نسمعك ما نفهمك
ما ننظر لخانة صفر

حكامنا ما .. يغدرون
ولا يجي منهم ضرر

دستورنا النهج السوي
ماهو بقانون .. البشر

قانون بشار .. الاسد
اجرام .. واذلال وقهر

والا حمد وابنه تميم
اهل الخيانه .. والغدر

ياحزب الاخوان اخرصو
سيسي طردكم من مصر

حنا على وضح النقى
يامن تدوور .. للقشر

العب على قدك ترى
حد السعوديه خطر

سلمان سلمان الحزم
سيفه على الظلم انشهر

صحى جنون الفارسي
وارتاع قلبه وانكسر

ومحمد الشهم الذكي
طور ونظف واشتهر

اشراف والله خصهم
خدام لبيوت .. الطهر

معك معك .. يابوفهد
في يسر والا في عسر

اطنخ وحنا لك سيوف
اللي يقابلنا .. انتحر

والله .. لا نلعن ثواه
ونجلده بطن وظهر

لبيك يا اغلى وطن
وارواحنا دونك .. مهر

عبدالله سليمان

.

.


المملكه برعاية الرحمن
ينصر حكومتها ويحميها

هذي بلاد الخير والإيمان
لكل مسلم تبسط ايديها

مهدالرساله خيرة الاوطان
والنور شعشع من اراضيها

يارب تنصرها على العدوان
واهزم بجندك من يعاديها

سلمان ومحمد ولد سلمان
ملوك بالارواح .. نفديها

الرافضي والحاقد الخوان
صيودنا في الهيج ندميها

لا قرّبوا واشتبت .. النيران
نحرق معاقلهم .. ونمحيها

عبدالله سليمان

.

.

بشّـار عـم الشعب ظلمه وجـوره
واكثر ضحاياه النسـا والصغـاري

ليته على اسرائيل وجّـه نسـوره
واعلن عليـها قـوّته .. والطـواري

ذا احتلـوا الجـولان والغـو عبـوره
واسقوه من كاس القهر سم هاري

عوّد على شعبـه يجمّـع شـروره
لانه جبان ومن كسى الدين عاري

الكل يا بشـار .. يبـدي نفــوره
تدعي عليك الناس ليل ونهاري

اولدت من رحم المعاناه .. ثوره
وتفجرت من عقب طول الحصاري

موج القهر يكـبر .. وتكـبر بحـوره
والظلم .. لو طالت حباله قصاري

الظلم يسقط لو تعالت قصوره
والحق يظهر لو يطول المداري

يالله يا منزل من الوحي سوره
يخشع لها قلب .. وتهل العباري

تخزيه في الدنيا وتقطع دبوره
واجعله للعالم .. عظه واعتباري

سلّم كلاب ايران .. علمه وشوره
واخذ الخميني له طبيب استشاري

في الحكم لكنه على الحكم عوره
دولته ضاعت بين بايع .. وشاري

يتمسكن لبوتن ويطلب حضوره
يحمي نظامه بالذهب والمصاري

الفرس اوامرها .. تنفّذ ضروره
والشعب تنهشه السباع الضواري

الشعب عاش الذل معنى وصوره
مشرّد ٍ في كل ملجا .. وداري

مابين نيران الفقر .. والخطوره
ماهو بطيّب .. لو تشوفه يداري

ناس ٍ ذبحها الجوع لكن صبوره
وناس تشحذ بالطرق والحواري

حسيبك الله يوم تعرض نشور
وبذمتك لاهل الدما نهر جاري

بشار بين الروس وايران كوره
والناس تنظر له بكل ..احتقاري

عبدالله سليمان

.