.


ارسم الاهداف حسب الشريعه والسلوم
وغايتك بامر الله الواحد ان تاصل لها

وان جفتك الحاجه اللي لها فكرك يحوم
عدّها خيره وفرصتك ما جا حلها

لا تعنّيك الحسايف .. وتاكلك الهموم
ان جت الدنيا معك طوع والا خلها

الحياه ارزاق والعبد له رزق امقسوم
واطيب العربان ترضى بما يقسم لها

ادع ربك يستر الحال والصحه تدوم
والفروض احرص على كل فرض وصلها

سعد من ياخذ من الوقت لاوقات اللزوم
سجدة ٍ لله في القيض يحمي ظلها

ياكثر ما الناس تحلم وياكبر الحلوم
واخر المشوار .. ترجع حلوم ٍ كلها

القناعه كنز ..تغنيك عن بعض العلوم
لا تأثر بالمظاهر .. ولا تحزن لها

عبدالله سليمان

.

لمو الشمل يكفي ما مضى من سنيني
شوفو اليــوم وقفتــكم تغيض الاعادي

.


جازيتني بالهجر .. ما خفت ربك
في من يحبك والوفا من سماته

ان كنت متهني بزادك وشربك
ترى وليّفك ما اهتنى في سباته

رحلت مدري وين شرقك وغربك
على الطريق احترت فربع جهاته

تركتني ما بين بعدك .. وقربك
مثل الضرير اللي مضيع عصاته

مات الامل ضامي على جال دربك
والياس عقب الموت شيّع رفاته

انا الذي صان الهوى ما غدربك
واهداك قلبن سكّنك في نواته

وانت اللي احرقته بنيران حربك
واطفيت شمعات الفرح من حياته

عبدالله سليمان

.

.

سر يا قلـم واكتب على ما طرالي
عبّر عن الضيقه بمضمـون الاشعار

الصدر ضايق حيــل والصبر طالي
والوقت لاعمار .. المخاليق هدار

كنت ازبن الهقـوه على رجم عالي
واكسر مجـاديف الزمن عزم واصرار

اثر الزمن .. يثلم سيوف الرجالي
والناس تحكمها صـواديف الاقدار

في ما مضى والحظ والسعد جالي
اجمع شعاع الشمس واسامر اقمار

واليوم يا صـبري .. ويا ضيق بالي
اسهر طوال الليـل ضايق ومحتار

طاحت مفاتيح الرجا في الرمالي
والجو رعد وبـــرق وريـاح وغبــار

مدري سببها جو .. ما قــد صفالي
والا السبب في حظـي ايدينه اقصار

اسج بفكـــاري .. يمين .. وشمالي
اقرا .. كفـوف الوقت والوقت دوار

شفت الزمن ماله رفيــق ٍ موالي
اذا صفا لك يوم باغتك باعصـار

لــو كل شي ٍ .. ينشـــرى بالريالي
شريت حظ ٍ ما تحداه الاخطـــار

يالله يا المعبــود يا ذو الجــلالي
ياعالمن بحوالنـــا .. ســر وجهار

تجلا همومن فـوق صــدري ثقالي
تطـلع وتنزل كـن فـ القلب منشار

انت العـزيز اللي .. عليه اتكالي
وانت الملاذ بوقت يسـر ٍ وباعسار

وفي الختـــام افضــل كلام يقالي
على النبي صلــو عــدد وبل الامطار

عبدالله سليمان

.

.

يا شموس الحق من بعد العســام
زيلي العتمه عن الطرف الحسين

خبّريــه ان الوفـا عهــده مقـــام
والعــلاقـــه حبلـهــا حبلن متين

الغـــلا في خافقي له ما يســام
والمحبه .. ما تغيرها .. السنين

في لســان الشك نــيران وحسام
لا يجرّحني .. بسيـف .. الآثمين

الحقايق نور .. والشكّه ظلام
والشكوك تزيلها شمس اليقين

ماترى عيني ســوى بدر التمام
وما سكن في خافقي غيره ضنين

ان تفــارقنــا غدا شــوقي ضــرام
وان تــلاقينــا لقــــاء العــاشقين

المحبه في رضـــانــا والخصــــام
ما تغيرها ضنـــون الحـــــاسدين

عبدالله سليمان

.

.


ياحبيبي ترانا نركن .. اللي ركنا
ما طردنا ورى من عافنا ياحبيبي

كلما اجيك منا واقترب جيت منا
لا انت عنا بعيد ولا انت منا قريبي

وان بغيت اقفل ابواب المشاريه عنا
دام شفت ان مالي في هواك النصيبي

قمت تعزف مواويلك على كل فنا
لين حبك تمكن من خفوق الشغيبي

لا تسلى وتلعب في قليب المعنا
يا تجي صح يا تبعد بعيد وتغيبي

ليت وان المحبه جت على ماتمنى
لجل يرتاح قلبي من عناه ويطيبي

علتي من هنوفن بالجمال يتغنا
كل شي ن يجيبه بالرضا والغصيبي

لا طرقه الهوى مييل وقام يتثنى
خف عود الليانه فالجمال العجيبي

اشهد انه نعيم اللي لقلبه تسنا
واشهد انه عذابي فالحياه وطبيبي

عبدالله سليمان

.