خيام اليتم ..

والله ان حال الناس والوقت حاله
مابين شح النور في حفلة النور !!

والدرب ضيق في وجيه الجماله
يحشد (لصناع الكوابيس) جمهور

واللي غرق صدره بنصف البياله
لايحمل البيرق ولا يحمي السور

راسه عجز عن حمل حتى عقاله
ويذم عين الشمس والطرف مكسور

من سدرة (ثميده) لصفري (تباله) *
همه وسط خيشه وحله ودافور

معنى الوطن عنده رفاق الضلاله
في رابعه ربع وفالشام مسعور

وان قيل يادرع الوطن يارجاله
ماحرك السانه عسى الجند منصور

يبكي على المرشد ويبذل رياله
ويحشد الى داعش قنابل ومغدور

يبقى الوطن شامخ بتاج وجلاله
في ظل" قايدنا" اخو مشرق النور

واللاش ناقص والتحزب هباله
لايشري الفرحه ولايعمر الدور

كذبه يعري نيته في جداله
اعمى وينعت بالعمى واضح الشور

طبه خلط وهمه وزمزم سعاله
ينهب عليل الجهل ويعل دكتور

السعد في فرقاه والسود فاله
والحر مايرضى بصندوق عصفور

يطلق جناحه والفضا راس ماله
وبيته على روس المراقيب مشهور

والبدر طلة بهجته في عجاله
والشمع باقي الشهر يتقمص الدور

ياعاذلي حرفي ضماد ورساله
ينسج ثياب العيد ويدلل الحور

والمترف اللي حل قلبي لحاله
له غنوة الشاعر وله باقه زهور

عطره زرع قافي وشتى وصاله
رحل وخلا منزل الشوق مهجور

شتى حنيني في مرابع ظلاله
والجذع ما يسقط اذا الغصن مبتور

وان هب عطره قلت له كيف حاله
من صار شباك المناجاة محظور!

وليل التعب ماشاب واهلك عياله
ينصب خيام اليتم ويطفي النور!!

#ضيف الله بن سليمان
...
*ثميدة :جبل في تهامه
تباله : وادي معروف في منطقة في بيشة