تويت
من أجمل ما قال رشيد الزلامي .
الشاعر رشيد بن زيد بن مسيند الزلامي العتيبي من كبار شعراء النبط، له قصائد في الرد والرثاء والنصح، وحاور كثير من الشعراء فيما يسمى بفن القلطة، ومن قصائده المشهورة:
إليا جهلت انشد ترى مابها عيب..
لاتنخدع للجهل وانت السبايب
عيب الفتى مافيه شكٍ ولا ريب..
ترك الفروض وقطع وصل القرايب
والعيب ترك ملزمات المواجيب..
وتبع الردا ومجالسة كل خايب
فالتجربه برهان مافيه تكذيب..
وليا جهلت انشد من القوم شايب
ولا اقول يوجد شايبٍ يعلم الغيب..
الغيب يعلم به مدير الهبايب
لاشك يوجد شايبٍ له تجاريب..
ومن الدهر شاف الفكر والعجايب
بيضٍ نواصي جبهته كلها شيب..
من كثر ما مرت عليه المصايب
قد صارع الدنيا على الخبث والطيب..
في البحر والا فوق عوص النجايب
وقال مناصحا:
لولا الشدايد ماعرفنا الصداقة..
ولا الرخى كلن بيمناه يومي
لكن فالشدة للأصحاب فاقه..
في ساعتن فيها تضيع العلومي
عليك بالصامل رفيق الرفاقة..
فالضيق يزمي مثل ضلع البقومي
هذاك خلك به قوي العلاقة..
صميدعن ينفعك عند الزومي
ولا ردي الخال حاول فراقه..
قربه يجيب لك البلا والهمومي
هذار فالمجلس وقطاع ساقه..
وليا جلس فوق الصحن مايقومي
وإنراح مع خطلان الايدي علاقة..
تسنه على القلب السليم محزومي
يظهر حصيله بالزعل والحماقة..
زهرة ربيع(ن) لونها مايدومي
وفي قصيدة بعنوان : دنيا العنا
قالـوا تعلمـت قلـت عنـاد وفـراسـه..
أصارع النفس والدنيـا واصارعــهـا
ودرست في مدرسة من شيّبـت راسـه..
دنيا العنا اللـي قضيفـاتٍ مطامعـهـا
تلميذهـا دايــمٍ تكـتـب بقرطـاسـه..
وتعطيـه جملـة دروسٍ مايضيّعــهـا
والله عطانـا نظـر وقلـوب حسـاسـه..
ناخذ علوم المعرفـه مـن مراجعــهـا
ونسايـر الوقـت ونقيـسـه بمقيـاسـه..
ونوجـه النفـس بالواقـع ونقـنعـهـا
وترى حيات الفتـى مهمـا قـوى باسـه..
محفوفـةٍ بالخطـر والمـوت تابعـهـا
من مبتدا العمـر حتـى يلفـظ انفاسـه..
يمـر فـي مرحلـه تكثـر زوابعـهـا
أول حيـات الفتـى مشـوار واعساسـه..
مسافةٍ فـي عجـاج العمـر يقطعـهـا
وثاني حيات الفتـى تدريـب ودراسـه..
تصعب ظروف الحياه وينشغل معـهـا
وثالث حياة الفتى يرجـع علـى ساسـه..
النقطـه اللـي بـدا منهـا يراجعـهـا
يرجع لسـن الهـرم ويضيّـع الطاسـه..
ويزحف مع الأرض ويخطــط شوارعها
وليـا تلاقـت متونـه وارتخـى راسـه..
ضاعت جميع العلــوم اللـي مجمّعهـا
ويقول بقصيدة أخرى..
وقت(ن) يخلي صاحي الفكـر يحتـار..
ويشوف من هول الدهـر مايروعـه
تلقى الفقير وفزعتـه خمسـة انفـار..
وتلقى الغني كـل الجماعـه فزوعـه
ياعاشق الدنيـا تـرى مالهـا جـار..
كما واحد(ن) في حبها طـار شوعـه
اليوم تضحـك لـه وتعطيـه الانـذار..
وبكـره تلحويهـا محانـي ضلوعـه
خلك علـى صكـات الأيـام صبـار..
ويوم(ن) يفوتـك لاتمنـى رجوعـه
اقفى على مافيه من خيـر واشـرار..
نجم(ن) هوى مايندرى عـن طلوعـه
وماهي على كيفـك تمنـى وتختـار..
ابعد على المخلوق من حـب كوعـه
يخبرك من ذاق المتاعـب والامـرار..
وحـاول ولاجالـه زمانـه بطوعـه
ومرت به الدنيا على بعـض الأقطـار..
في رحلة(ن) ماغيرت مـن طبوعـه
والله ماواطن عيشـة الـذل والعـار..
مادام لـي شيمـه ونفـس قنوعـه
وقرش(ن) عزيز أفضل من الفين دينار..
من مصدر(ن) للذل يعلـن خضوعـه
ولو الوساده من صلافيـح الأحجـار..
للراس أخير من التـرف والميوعـه
تعليق