تويت
صوت الصورة
صورة العددبستان يفتح نفس منهو كشت فيه
الماء والخضره وذكرى السـنيني
بين النخل والأثل يحلى المشي فيه
وبيتٍ قديمٍ شوفه يســـر عيني
تسلم يمين اللي شقى وأشتغل فيه
صوت المكينه يطربك بالرنيني
أهل الفلاحه شغلهم نفتخر فيــه
قبــــل التطــــوّر كدهــــــم باليدينــــي
خالد ناصر المخيمر - روضة سدير
ــــــــــــــــــــــــــــــ ـــــــــــــــــــــــ
يا زين وقتٍ مضى يا ناس
يوم المزارع على الهــــــــــوني
صبّاب يضرب ولا غطاس
والبركه اللي تشوفــــــــــــــــــوني
أجدادنا ما بغوا حـــــــــــــــــرّاس
ياما من الخــــــير مدفـــــــــــــــــوني
عبدالكريم عبدالرحمن السلّوم - القرائن
ــــــــــــــــــــــــــــــ ـــــــــــــــــــــــــ
وقت المكينه والنخل والحياله
يوم القلوب الصافيه والنظيفه
والجو يا حلوه على كل حاله
بين البيوت وبين خيره وريفه
هي راس مال اللي يباري حلاله
يطلب معيشه ما يدور وظيفه
رزقه على اللي ما يخيب سؤاله
اللي يفك الضايقه .. والكليفه
حمد عبدالله الوايلي - حوطة سدير
ــــــــــــــــــــــــــــــ ــــــــــــــــــ
وين انت ياللي تبي تسبح
تعبان والشـــــــغل هـــــدك هد
هذا القرو ميتـــــــــه تطفـــــــــح
بارد وجــــلدك يشـــــده شـــــــــد
في مزرعة شــــــايبٍ ماكـــــح
جو الطبيعـــــه جعل له ســــــد
يا كل ويشرب طعامه صح
من ناتج ارضـــــه وبيــــده كد
عبدالكريم النغيمشي - لوذة
ــــــــــــــــــــــــــــــ ـــــــــ
يا حلو شوف الزرع يا زين شوفه
عيشـــة الأجــداد بســـنينٍ قديمـه
كم بها خيرات ماضيها معروفه
والمياه موفرة ماهي عـــــديمه
من ملكها دايمٍ نفســــه لهوفــــه
فضلها وافر بخيرات وغنيمه
والمزارع حبها صعبٍ وصوفه
في بلدنا يا عســـــى ربي يديمه
محمد عبدالعزيز الخنيفر - أشيقر
ــــــــــــــــــــــــــــــ ـــــــــــــــــ
ياذا النخــل وين الذي غارسك حيش
والبيت من طول الهجر أصبح أطلال
ومويــــــــــــه قليــــــبٍ ببركــــةٍ للمعاطيش
يروون أهل الحي بسطول وسحال
ياما عنوا له من ضيوف ومطاريش
راع الفلاحه في الكرم خوش رجال
جواً عليل وخضره وصفــــــوة العيش
مابه ازعاج للموبايل وï»» إرســــــــال
سعود عبدالعزيز الهزاع - نعام
ــــــــــــــــــــــــــــــ ـــــــــــــــ
ياما حلى ثلاث في وسط واحه
الميّ فيها والنخل زرع وخضار
يحلى بها المقعاد .. والإستراحه
وسجــــــــــــت الرجــــلين بتلى النهار
بقعـــــةٍ للفكــــــــر فيـــــــــــــها مســـاحه
وللقلب فيها متعةٍ وأيضا الانظار
وتلقى بها عن لجة المدن راحــه
وعن البـــواري واكتظاظ العـــــــمار
سعود عائش الحربي - جدة
ــــــــــــــــــــــــــــــ ــــــــــــــــ
شوفوا المزارع والنخيـــــــــل الجميــــله
والماء نمــــاها نعمـــــــةٍ كلها خــــــــير
أرضٍ تســــــــر القــــــلب ما به مثيله
شوفوا مناظرها وزيـــــن المشـــــاجير
وشوفوا النخيل اليوم ماكثر حصيله
فيها العــــذوق اللي نشــــــــوفه مزابير
ياما تفيــــــــــــدك له ســــــنينٍ طــويله
فضله عظيمٍ للجـــــدود المخــــــــــابير
ريان محمد الخنيفر
تعليق