تويت
- صوت الصورة
منظر الصورة يزيد القلب فله منظرٍ ماهوب في جو المدينه
صورة العدد بعدسة - يحيى الشهري ‫â¬يا حيْ هذا الشوف والسّيل جاري
عِـقـب المطر يجلا صدا زايد الهـمْ
هذا هوى اللّي للمشاوير ضــــــاري
لا ضاق من صَـدّة ولـدْ خالـه أو عـمْ
وعاف البخيل اللي إبْماله إيماري
وإن جالـِه الـمِحْتاج صدْ أو تـبلّـمْ
الـصبـْح والا بأول الـليـل ســــاري
لا.. لا حلـه برّاق عفـْشه إمْـولّــم
فهد عقيل الطويان - بريدة
ترى النخل يحتاج خدمة وتكريم
وإهمالها ما هي بسيرة حميدة
عسبانها متهدله زود تحطيم
من فقدها لأمثالها جت فريدة
تشكي لربه كثرة الجور والضيم
لو كان تنطق كان سوت نشيدة
علي الرشيد - رياض الخبراء
الجبل ثابت وشامخ في محله
زان جو الجو والمكشات وينه
المكان الزين وينه من يدله
يمكن إنه يا بكر من فوق لينه
منظر الصوره يزيد القلب فله
منظرٍ ماهوب في جو المدينه
وشوفة الشلال يدرج مع مطله
في مصبّه تنبت أشجارٍ متينه
حمد عبدالله الوايلي - حوطة سدير
الحمد لله وأرضنا عمّها الخير
يا سعدنا يا فرحنا يوم جانا
ذي نعمةٍ يا ناس تحتاج تقدير
والشكر لله ربنا اللي عــــــطانا
واليوم أشوف الناس تضرب مشاوير
لأجل الربيع اللي به الجو زانا
وهذي نصيحة كلها اليوم تحذير
ابعد عن الوديان وخلّ الهوانا
محمد عد العزيز الخنيفر- أشيقر
الله على جوٍ يشوقك نسيمـــه
الماء والخضره ورفقة مطاليـق
على غدير شوفتك له غنيمــه
يحلى به الفنجان مع فكة الريــق
ومن بعدها كبسه برز الوليمه
ولحم الهرافا مثلها ما بعد ذيق
مكشات تحيا به قلوبٍ هشيمه
ينسيك مايكدر على البال ويضيق
خالد ناصر المخيمر - روضة سدير
سالت أراضينا في كل الأقطار
يا فرحة العربان يوم بمجـــــيّه
يا زين أرضٍ كلها خيور وأمطار
أفراح تلو أفراح ونفسن رضيّه
بجوٍّ ربيعي ويا حلو شبّة النار
ومجلس ربوعك مع طيب نيّه
سوالفٍ يا زينها ضمن الأخيار
فيها الهنا فيها الثنا بلا خطيّه
تعليق