علـى الموعـد بلهـفـه جـيـت لا مـانـع ولا تأخـيـر
لفيـت مـن العصـر هايـم مـع ان الموعـد المغـرب
وجتني بس انا مـدري شعـرت الجيّـة هـذي غيـر
وهي تقرب من عيوني شعـرت ان الممـات اقـرب
وقلـت الله يهوّنهـا عسـى فــي جيّـتـك لــي خـيـر
انـا مـن شفتـك أقبلتـي وانــا خـايـف ومستـغـرب
علـى كثـر الحـكـي مــدري كـأنـه خانـهـا التعبـيـر
وقالـت لــي جـمـل وأشـيـاء لا تكـتـب ولا تـعـرب
هـدَت فجـأه.. تطالعنـي وأنـا فـي حـاجـة التفسـيـر
لجل نحكي بهدوء اكثر سألت: الحلوة وش تشرب
فصاحـت بـي انـا احبـك ولـك فـي هالحشـا تقديـر
وتـدري ان المثـل فينـا وفــي احساسـنـا يُـضـرب
صحيح انّك وفي وانّـك بـري مـن تهمـة التقصيـر
ولـكـن ذي عوايـدهـم مــن ايــام وزمــن يـثــرب
تكـون البنـت لابـن العـم ورغبـات الكبـار تصـيـر
وتدري الاقربون اولى .. مع انـك للخفـوق أقـرب
وتــدري للـقـدر كلـمـة.. لـعـادات الأهـــل تـأثـيـر
لـذا أرجـوك تتركـنـي وانــا مــن دنيـتـك بـاهـرب
شعـرت بحكيـهـا كـنّـه قـصـاص وامــر بالتعـزيـر
شعرت الدنيا ضاقت بي من المشرق ليـا المغـرب
مشـت خلّـت وراهـا طفـل مـا يـدرك وش التدبيـر
يحسب ان الغـرام اشعـار شاعـر واغنيـة مطـرب
ضحكـت وماقـدرت انـي ألاقـي لضحكـتـي تبـريـر
مـن اللـي بوقتنـا مـرّه ضحـك مـن لدغـة العقـرب
رفضت أستوعب اللي صار ولا استسلمت للتغيير
ثمـان سنيـن اجـي نفـس المكـان بـحـزة المـغـرب
برغـم ان الثـمـان سنـيـن جــرح وكلّفتـنـي كثـيـر
أنا لليوم اجي وادعي.. تجي يارب .. تجـي يـارب