تويت
قبل العاصفه [
سنتجرد هنا عن الفصحى سأكون -هكذا -فقط !!
لا تعتبوا علي التفكك فهنا ذاكره متشتته !!
وثيقة تخرج ..
بكالوريس تربية وآداب .. ثقافة إسلامية ..
:
:
إستلام الوثيقة كان بحد ذاته إنجاز عالمي بالنسبة لي ما تطلعت لي إلا بعد شد واخذ ورد حتى أني تتطيرت بها ثم إستعذت من الشيطان ثلاث ..
وقتها بدأت أفكر بصنع مستقبل خاص في بتأيد من الله وتوفيق أولا منه وتسديد ..
:
:
وصناعة المستقبل تبدأ بتحديد الهدف والمسار والمنهج ..الحقيقة كنت أسعى أن يكون لي بصمة في التعليم وربما أريد أن أسير على نهج أستاذتي ودكتورتي وأمي الروحيه /رقيه المحارب ..
أول الخطوات تقديم طلب وظيفه في مدرسه أهليه أثبت تواجدي فيها ..
وبالفعل قدمت أوراقي وإجتزت الإختبار والمفاضله بنجاح وتم توقيع العقد مع المدرسه براتب وقدره 2400 في الشهر ..
مع إستلام نشاط المصلى ..
توقيع العقود كان في الإجازه الصيفيه ماعطيت نفسي أي فرصة لتنفس وفي منتصف الإجازه عودة المعلمات وتوزيع المناهج ..
الحقيقه أن الوضع اللي عشته في أول أيامي كان مضحك جدا
أنا المعلمه الوحيده الجديده في المدرسه أغلب المتواجدين من سنه وسنتين ومنه ثلاث سنوات أو تزيد أيام ماكانت المدرسه في المبنى القديم مثل يرددون دآئما ..
:
:
إجتمعت مديرة المدرسه بالطاقم التعليمي تعارف وكلمه عن الأنظمة وبعدها بدأت بالتخصصات تخصص تخصص حتى تقسم المناهج فكان الدين آخر التخصصات تقسيما ..
ولما جاء وقت معلمات الدين كل معلمه تنادي ترى أنا حاجزه المرحله الفلانيه معليش أنا بطلع مع بناتي والله أنا بجلس على مناهجي ..
تناتفوا المناهج وما بقى إلا منهج أول ثانوي ودفعته التي تشبه طلبة مدرسة المشاغبين ..
وقتها قالت المديره وأول ثانوي مين ياخذه مباشره إلتفتوا على ذا الضعيفه -هكذا أنا- وقالوا فلانه وأنا مازلت لازمة الصمت
قالت المديره :بس معلمه مبتدئة نعطيها اول ثانوي وبنات زي بناتنا مو صعبه شوي..
كل وحده من المعلمات تغير وجهها وأخذت تبرر لنفسها
وقتها نطقت!!!
-عفوا لكن أنا راضيه بمرحلة أول ثانوي أصلا درست هالمرحلة وقت التربيه العملي
-إيوه بس يابنتي ترى بناتنا غير عن بنات الحكومه
-عارفه وأنا قادره بإذن الله وبعدين مانستغني عن توجيهاتك يا أستاذه :..........
-ربي يسلمك خلاص أول ثانوي معك نصابك 15 مع نشاط المصلى لجميع المراحل
-تم
تراني قلت تم وأنا ما أدري إنه بانكرف كرف القدره ونون ومايعلمون ومالا يعلمون ..
:
:
غرفة المعلمات كانت عباره عن غرفتين غرفه لسعوديات وغرفه للأجنبيات ولا تسألوا لماذا سياسة دوله
جيت بشنطتي وأغراضي أدور لي درج مكتب يعني مافيه طبعا
قالت لي إحدى المعلمات القديمات
-ترى كلا يجدع أغراضه على ذا الطاوله وهالكرسي لأسماء وهذا لسحر وهذا أماني وهذا ريم وهذا مهب لحد خذيه
-شكرا
سحبت الكرسي وجلست فيه
جات لي مشرفة النشاط معلمه كلها طاقه ونشاط وخفة دم ومزح جلست جنبي وقالت شوفي ترى حنا راعين مزح وسعة صدر ولا بينا حزازيات والزعول ترانا نبعد عنه
-أنا أحب المزح وسعة الصدر ولنيب زعول طبعا مادام الدعوه مزح بمزح لكن فيه خصوصيات لكل واحده هذي اللي اتمنى محد يتعداها
-حلو حنا ماعندنا تعدي على الخصوصيات حنا خذي ذب ومزح على بعض وضحك وفطور وجمعه وقهاوي وفلة حجاج ..
وبالفعل كانت مجموعه من أروع مايكون تعاون وتفاني وإذا شافوا أحد مضغوط خففوا عليه ناهيك عن المؤمرات اللي كانوا يدبرونها للإداره بدون علم الإداره حتى ناخذ وقت من الترفيه وسعة الصدر
:
:
عودة الطالبات ..
ليلة عودة الطالبات كانت ليلة حاسمه بالفعل في طرق التدريس تعلمت أن الطالب يبني تصوره عن المعلم من أول حضور
وأنا كلا يشكي من طالباتي وكلا تاركهم ومرتاع منهم
جاء في بالي ذيك الليله إني اسحب على المدرسه ولاعاد أداوم/ وجاء في بالي إني أغيب أول يوم وأبتعد عن أول لقاء/ لكن بكره وراي وراي ..
أخر شئ قررت أصيح -معليش بس طريقه لتهدئة النفس - قفلت على نفسي وتذكرت كل الاشياء اللي تجيب الهم وصحت صحت على أمي وصحت على عمي وصحت على صديقتي وصحت على كل اللي أعرفهم ذيك الليله
ولما إنتهت نوبة البكاء رحت وتوضأت لصلاة وصليت لربي ودعيت ربي إنه يسخر لي هالبنات ويدلني على الطريقه الصحيحه إللي أقدر أتعامل معهم فيها ..
جلست على سجادتي لين أذن الفجر صليت وبديت إستعدادي لدوام ..
على فكره تراني مداومه بعيون منفخه وأنف متضخم من البكاء ..
أهتميت بكل شئ لبسي شعري شنطتي جزمتي -أكرمكم الله-ساعتي خاتمي الحلق الصغير كل شئ وادق التفاصيل.....
:
:
:
الساعه 6:15 أنا في السياره ..
-عاد مهب إذا طقوك البنات تصيحين إللي يطقك طقيه
-وش دعوى يبه عاد توصل لطق
-إيييه توصل لطق أهم شئ خوذي معتس عجرا وإلا شئ
-لا مايحتاج أخذ شئ إنت ناسي إنه معي الحزام الأصفر
-وش بينفعك الحزام الأصفر خلي جوالتس معتس وأنا كل شوي بدق
-ماودك تداوم معي تجسرني أول يوم
-عادي يوافقون أشوف ذا البنيات كنهم بناتي
-يبه كنهم بناتك هاه أصلا بتصير فتنة في الأرض
-ليه ؟
-البنات بيعافون كل شباب المستقبل ذا الضعوف ومحد مالي عينهم عقبك
-كل فتاة بأبيها معجبه
-لا والله الحق حق وإنت إسم عليك تكبر وتزين كنك جورج كلوني ترى هذا التشبيه مهب مني بنات خالاتي أطلقوه يوم شافوك ذا اليوم
-ماخذتي منهم أخاف ينحتوني
-إذا قريت وردك مهب ماسك شئ مع إن نوره عويناتها صغار وإللي عيونه الصغار يكون أشد تركيز في النحت لكن نفعصها وناخذ أثرها كلششش ولا أنت
-المهم بس إذكري ربك والله الله بالتعامل الزين ومثل ماتبغين المدرسات يعاملون خواتك إنت عاملي بنات الناس
ياه كنت محتاجه لهـ/الجمله محتاجه لها مره ..
مسكت يده وحبيها دعواتك الطيبه ياغالي
-الله يوفقك استودعك الله الذي لا تضيع ودائعه
نزلت من السياره والمدرسه مزدحمه بشكل رهيب أشكال وأنواع أحجام xxL
الحين أنا وين أشرح لهـ/البنات ماشاء الله عمالقه هذا وانا لابسه شئ محترم تحت إسمه كعب أجل لو جيتهم مسح وش بصير ..
دخلت الإداره والمديره بوجهي
-هاه اليوم يومك ياعروس ترى اليوم بالذات يا تكسبينهم يا تخسرينهم وإنت قدها
-الله يعين والله إني ليلي كله أدعي ربي ولا نمت
-أفا ليه بس صدقيني رغم إنك جديده لكن بتحققين معهم شئ هذا شئ أنا أشوفه فيك <--- تدهن سيري
-طيب كيف أدخل عليهم يعني أعرفهم بنفسي أسمح لهم يسولفون
-تبغين أعطيك جدول وطريقة عن أول دخول لك
-ياليت والله
-شوفي تعاملي معهم حسب طبعك والبنت ذكيه تعرف اللي يعجبك واللي ما يعجبك لا تحطين في بالك إنك راح تخضعينهم لك لا حطي في بالك إنك راح تكسبينهم
-وأنا هذا إللي أبغاه ما ابغى اقضي السنه مطاق معهم
-أجل بتكسبينهم صدقيني روحي خذي لك فنجان قهوه فوق وروقي وإذا ضرب الجرس إنزلي
-طيب شكرا يا أستاذه
-ولو إنت من اليوم بنتي
-أجل يا حظي
-ليه ؟
-لأنك أمي وأنا بنتك ومعناتها مابترضي بالغلط علي
-هههههههههههههه إللي بيغلط عليك أمه ماجابته
طلعت فوق وبديت أرتب أشيائي المعلمات كل وحده نظرها متجه لي مدري ليه أو هو مجرد شعور فقط
-مستعده اليوم
-نقول إن شاءالله
-شوفي أهم شئ تفرضين شخصيتك عليهم إدقميهم أول حصه يمشون معك صح
-طيب ليه أدقمهم يمكن ما يصدر منهم شئ
-شوفي سوي لك كبش فداء
-كيف؟
-يعني بنت تتحرك حركه بسيطه إغسلي شراعها وإرفعي صوتك وخلي البنات يشوفون وجهك الثاني وبعدها تشوفين إذا مامشوا معك صح
-طيب البنت ذي وش ذنبها وبعدين الموقف الأول لازم أسجله إيجابي مو سلبي
-ياه أسماء شوفي الخريجات الجدد ترى عادي تجين يوم الغرفه تشوفين معلمه منهاره من الصياح عادي جدا بسبب طالبه وإلا لا ياخلود
-أفا عليك ترى بناتك العام صيحوني لين قلت بس هنا أنهرت قهروني لا شغل ولا عمل ويبغون درجات وكل وحده لسانها طولها
-الله يعين تراني على جريف
أخذت لي فنجان قهوه وأفكار الدنيا تعصف في راسي جتني معلمة هادئه وصامته تفرض إحترامها على الجميع حطت يدها على كتفي
-تبغين ترتاحين
-إيه والله
-خذي عندك قاعده الإحترام يفرض ذاته دآئما
عندك أنا مثلا لي أربع سنوات هنا وماعمري رفعت صوتي على بنت ولا عمر أي طالبه غلطت علي فيه حد كلهم عارفينه وإنت إحرصي إنك ماتتجاوزينه لأنه الطالبه إذا شافتك تجاوزتيه
هي بتتعدى أكثر إما من باب المونه أو الوقاحه
-صح وكل الناس كذا أصلا وش فرق الطالبه عن الناس هي شريحه من ذا المجتمع
-أندري !! يالله ننزل ترى ضرب الجرس عند أي فصل أنت
-مدري بشوف أنا عند أول /ثاني
-حلو جنبي أنا عند أول / ثالث
-منى.
-لبيه
- شكراً ..
-تعالي بس
نزلت وأنا أحمل ثقه ثانيه ثقه أقوى من قبل أستمديتها من ربي سبحانه وتعالى أولا وثم من أبوي من مديرتي من الإنسانه إللي تنزل معي الدرج وهي ماسكه يدي وكأنها تشد من عزمي
مشيت معها بالساحه والأنظار حولي من ذي المعلمه الجديده ..!!
حسيت إني من كوكب ثاني مو بس كذا شكيت بنفسي بشعري بمكياجي بلبسي وبجزمتي سألت منى
-بالله كيف شكلي
-معلمه قديره واثقه ماعليك البنات تعودوا على العجز الحين جتهم دماء شابه على فكره هالمدرسه مدرساتها كبار ومايتركونها بالسهوله يعني كنها قريبه من الحكومي
فعادي يبحلقون فيك الطالبات
شوفي حنا نوقف قدام الطابور ورائدة الصف توقف ورى الصف أي بنت تتكلم عطيها نظره إذا فهمت حلو إذا ما فهمت أمشي لين توصلين لها وقفي جنبها بتسكت
-تمام
بداية الطابور كان صوت عبدالله بصفر وهو يقرأ خواتم صورة البقره ياه يا بصفر صوتك يترجم معاني القرآن خفض الصوت ورفعه والسكون والهمس كلها توضح معاني القرآن
مخارج حروفك الصافيه الله أعطاك عذوبة صوت تجبرنا إننا نتذوق القرآن معك كلام الله دخل قلبي بهاك الصوت العذب راحه وطمئنيه وسكينه مدري ليه حسيت بنفس الوقت بدمعه وكأن الدمعه بتفر مني
لكني مسكتها ماكانت دمعة ضيقه لأنها ماخنقتني لا كانت دمعة راحه حتى مع مصادرتها ماحسيت بلوعه لا الراحه سكنت الروح ودفء سكن أعماقي البارده المرتجفه..
بعد هالكلام الحيً الطيب الذكر جات كلمة المديره ترحيب وتوجيهات وبعدها وجهت الأمر بالتحرك كل معلمه تتحرك مع فصلها
بدت الفصول تتحرك فصل فصل اول متوسط وثاني متوسط ثالث متوسط أول ثانوي إلى هنا تحركت مع فصلي .
يتبع ....[
.gif)
تعليق