.



سر يا قلــــــم واكتب على ما طــرالي
عبّرعن الضيقه بمضمـــــون الاشعار

يا صــــــاحبي في مبهمـــــات الليالي
تعال ناخــــذ في دجى الليـــــل مشوار

اللي صــــلا قلبه من الهــــم صــــالي
اعـــزف مواويله على كـــل الاوتـــار

وانصب لقيفـــان الهمـــــــوم احتفالي
دام الفــرح غايب والاحـــــزان سمـار

تعال..اسولف لك عن اسبـــــاب حالي
ان كان لك قـــــــدره على كتم الاسرار

الصدر ضايق حيــــــــل والصبر طالي
والوقت لاعمـــــــــــــار المخاليق هدار

وانا اللي اتعبنــــــــي وزاد انشـــغـالي
حظ ٍ كسير ووقت قــــــــــــاسي وجبار

وهموم تشعــل في الضــــمير اشتعالي
وسط الضمـــــــاير يشتعل واهـج النار

كنت ازبن الهقــــــــوه على رجم عالي
واكسر مجـــاديف الزمن عزم واصرار

اثر الزمن يثلم سيــــــــــــوف الرجالي
والناس تحكمها صــــــــــواديف الاقدار

ما كنت احَسْب حســـــــاب سود الليالي
ولا..عْوى سرحــــان في جرد الاقفـــار

في ما مضى والحظ والسعــــــــد جالي
اجمع شعاع الشمس واســـــــامر اقمار

واليوم يا صــــــــــبري ويا ضيق بالي
اسهر طوال الليــــــــــــل محتار محتار

اللي هويت وصـــــــــــورته في خيالي
اقفى ولا ادري مسكنه باي الاقطــــــار

ان قلت بســــــــــــلى عنه ماني بسالي
ذكراه تحييها المشــــــــــــاعر والافكار

طاحت مفاتيـــــــــح الهوى في الرمالي
والجو رعد وبـــــرق وريـاح وغبــــار

والطيحه اللي تعـــــــــتبر راس مالي
آمال مفقــــــــــــوده وحلم الهوى طار

مدري سببها وقت ما قــــــــــد صفالي
والا السبب في حظــــــي ايدينه اقصار

اسج بفكــــــــــــــاري يمين وشمالي
اقراء كفــــــــوف الوقت والوقت دوار

شفت الزمــن ماله رفيـــــــــق ٍ موالي
اذا هدى ساعه يبـــــــــاغتك باعصــار

لــو كل شي ٍ ينشــــــــــــرى بالريالي
شريت لي عكــاز حظـــن للاخطــــــار

يالله يا المعبـــــــــــود يا ذو الجــلالي
ياعالمن بحوالنـــــــــــــا ســر وجهار

تجلا همومن فــــــوق صــدري ثقالي
تطـــــلع وتنزل كـــن ف القلب منشار

انت العــــــزيز اللي علــيــــه اتكالي
وانت المــلاذ بوقت يســر ٍ وباعسار

وفي الختـــام افضـــــــل كلام ٍ يقالي
على النبي صلــو عــدد وبل الامطار



عبدالله الشغيبي






.

.



سقى الله صدفة الروض البهيج وهفهفات النود
وراع البندق اللي جـــــا يصيــد وراح منصادي

على روضن ليا هب الهوى غربي ومال العود
شذاها من عبير الـــــــورد والريحان والكادي

روابي نجد خصبه تغـــرس الفسله وتنبت خود
وروده تسلب اللـــب الفطــين وغصب ينقادي

لمحته من بعيــد وشـــــد حسنه قلبي المصيود
وصوبنــي بنظــره مــــــــا رفعهـا الا توكادي

تشن الحرب لين استأ سرتني بالعيون السود
اسير ٍ في هواهــا واعلنت موتـي وميــلادي

انا وش جابني درب الخطــر ياحظي المقرود
الا يا كم نصحت القلب غير النصـح ما فادي

ادور لي طريقـه والطـــريق النـــافذه مسدود
على بابه حرس متجمهره وسيــوفن حدادي

لو انما كل من يمشي على درب الهلاك يعود
ابمشي دام مركبنا الطمـوح وجرحنا الحادي

طموح النفس نشقى في مراده والعمر محدود
تريــد نفوسنا والحيــل غادي والعمـر غادي



عبدالله الشغيبي





.

.



روعه المنظر بشاطي هاف مون
أمس من بعد العصر والشمس حيه

البحر هادي وبانســـــامه شجون
يعطي المرتاد دفعــه معنويـــــه

يجذب اللي في جماله ينظرون
والطبيعه فيه سر الجاذبيـــــه

الســــحابه في الفضا يتعانقون
ترسم احلام القلوب العاطفيه

كنها وسط السما رسمة فنون
شكلت في الجو لوحه شاعريه

وانحدار الشمس يوحي بالغبون
بالفراق تذكر النفس الأسـيه

من أفقها للبحر تهــوي بهــون
كنها تكتب لشطآنه وصيـــه

والشفق لونه كسا الأمواج لون
ترتدي لون الذهب في كل طيه

والرمال تشـــرّع الصدر الحنون
تحتضن موج البحر روحه وجيه

شفت موج البحر لضفافه يمون
بينهم ولف ومودتهم قويـــــــه

مثل خيلن غايره يتســــابقون
تقصدالشاطي لضيفـه حاتميه

يقدمون وفي رحابه يقلطـــون
والمرحب فارشن صدره تحيه

والكواكب والغيــوم يشاركـــون
كلهم في الجود والضيفه سويه

كن مرزوم السحب عجة دخون
وكن بيد الشمس دله شاذليه

وكن صوت المـوج قيتار ولحون
لحنها تطرب له النفس الزكيه

الطيور من الو نـاسه يرقصـــون
طائر النورس وغاق السقطريه

كنت أعيش الجو وحدي في غضون
ســــــــاعه وياليتها مرت بطيــه

البحر يجلي عن النفس الحــزون
منظـــره جذاب واجوائه نقيـــــه

أثر من حولي عـــرب يتفرجون
والأصابع تتهمني بالخطيـــــه

نظـــرة الزوار لي شك وظنـون
في نظـــــرهم كل عزابي بليه

يوم عطله والعـوايـــل يطلعـــون
واكثر الجلسات جلســه عائليه

الصغار على الشواطي يلعبون
والكبار مع عوايلهم نديـــــــه

شدني صوتن مع اللي يضحكون
التفتت آشوف له من حســن نيه

افتنتني نظــــــرة الرمش الفتون
واطعنتني طعنتن ماهي بريـــــه

هــــزة الخفاق من كل الركـون
واشرقت لي كنها شمس الضحيه

وانثنت ثني العواتي للغصـــــون
قصدها تلعب في اعصابي شويه

قمت أغض الطرف كي لا يشعرون
وادعي ان الله يعــــــدي هالعشيه

أصرف النظـره وانا كلي طعـــون
واتحلى في شــــيمنا الاوليـــــه

ما شبيهن للبحر غير العيـــون
كيف بحجب نظــرةالعين الشقيه

آهـ لو وضعي ووضعه يسمحون
والله ان تشــرق وانا باقي هنيه

لكن اخــلاقي وديني يحكمون
كسّرت شوك الاماني في يديه

وبينما الجلسـه تكون أو لاتكون
والصراع اشتد بالفكر وخويه

قام يصدح شيخنا في المكرفون
بالأذان أعلن صــــلاة المغربيه



عبدالله الشغيبي





.

.



كـلمـا مريـت مـن ديــرة الربـع الكرام
اسهب النظره على دارها شـوق وحنيـن

خاليـه مـا غـيـر بيتـيـن لطـيـور الحـمـام
هاجر اهل الدار حتـى الطيـور مهاجريـن

هاجس الذكرى على اطلالهـا حلـق وحـام
لين وقف بي علـى اول محطـات السنيـن

اتذكر ضبـي مـا شفـت مثلـه فـي الأنـام
لـو يصفـون العـذارى فــلا مثـلـه يمـيـن

اول ايـام التلاقـي لمحـتـه فــي الـزحـام
مـن يشوفـه قـال سبحـان خيـر الخالقيـن

العيـون وسـاع والقـد ممـشـوق الـقـوام
آية ٍ في الحسن والذوق والعقـل الرزيـن

حين سلت رمشهـا صـاب قلبـي بالسهـام
حسبي الله ويش سوابي الرمش الحسين

قلـت بالله ارحمـي مـن تولـع بـك وهــام
ما معـي حيلـه واضنّـك بعـد مـا ترحميـن

قالـت الا خـل عـنـدك تـــأدب واحـتـرام
روح دور لـك علـى نـاس مثـلـك بايخـيـن

قلت ما غيـرك مـلا العيـن يـا بـدر التمـام
والله انـي خالـي القلـب ومـن الصادقيـن

مقصدي ماهو في اللعـب ودروب الظـلام
يشهد الله وانتي ارضي بخيـر الشاهديـن

قالت ظروفي صعيبه ومـن حولـي حسـام
وانت ما تدري بسطو السيوف الصارميـن

الهوى لعبـه وحـب الشـرف ولـى وشـام
راحت ايامه مـع اهـل القلـوب الطيبين

والقبايـل تحـت حـكـم العـوايـد والنـظـام
والعوايـد مـثـل رآي الـعـرب متخالفـيـن

قلت لا صرنا علـى قلـب واحـد مـا نضـام
بالمحبـه نبلـغ القـصـد والقـاسـي يلـيـن

واتفقنـا نحـفـظ العـهـد ونـصـون الـكـلام
ريثمـا الفرصـه علـى مانخطـط لـه تحيـن

أحكمـت قلبـي بـصـك الـمـوده والـغـرام
والمشاعـر فـي رضــا حكمـهـا متقيـديـن

العنـود اللـي غدت شوفته غايـة مــرام
فيـه انـا بالحيـل مجنـون وجنونـي يقـيـن

لـو حصـل بينـي وبينـه زعـل والا خصـام
صرت ما ميز طريق الشمـال مـن اليميـن

دنيتـي لامـن غشاهـا ظلامـن فـي ظـلام
اشرقت شمس الضحى من وجانه والجبين

ارتقيـنـا بالمحـبـه عــن إدناس الـحـرام
رغـم همـزات العـواذل وكيـد الكايدين

الامانـي حلـم نبنـي بـه اقـصـور ٍ عـظـام
والمشاعـر نفـح جـوري وفـل وياسمـيـن

ما حسبنا الوقت ما نعطي الوقت اهتمـام
السنـيـن تـمـر واحـنـا بنـشـوه عايشـيـن

ليـن جـا لقصـور الاحـلام بالقـاع ارتـطـام
والخبر زلـزل كيانـي فـي الليـل الحزيـن

ودنـا بالـقـرب لـكـن فــي ايديـهـا لــزام
سلعة ابـن العـم حاجـز عليهـا مـن سنيـن

تشتكـي ودموعهـا مثـل هـمـال الغـمـام
قالت ان الموت منـوه لهـا فـي كـل حيـن

في حياتي ما خذلتـك بلحظـه يـا ابتـ ....
جيـت وسيـوف المنايـا بوجهـي تذكـريـن

لكـن الواقـع صدمـنـا وصدمـاتـه جـسـاام
والظـروف امسـت علـى دربنـا متكالبيـن

يـا عسـى حـظ ٍ تعثـر بـذاك الوقـت قــام
وانجـلا عتـم الليالـي وصـار الـجـو زيــن

والله ان اموت ما انسى غرامك والسـلام
نعمـة النسيـان 'طافـت قلـوب العاشقيـن




عبدالله الشغيبي






.

.



البــارحه سهران والقلب مخطوف
اسباب غرون صـاد قلبي وشاله

توه صـغـير وبالحسن كامل وصوف
سبحان من صــوره وابدع جماله

القد غصـن البـان والخـصر ملهوف
والخـد مثــل البــــدر ليــلة كماله

حور العيون يحوفها جيش مرصوف
والخشم في التصـــوير آيه لحاله

الثغر خاتــم حوله الشهد محفوف
يبـري عليـل الــروح ويزيـن حاله

امــا الثنـايا كنـها لووول مصفوف
من تبتسم له طيييب السعد فاله

والعنق من زود الحلا فارع النوف
تاخــذ مزايين الظبـى من خصاله



عبدالله الشغيبي






.

.



يالطيــف الــروح يـــا روح الغـلا
يا فريد الحسن يا صعب الوصوف

والله ان القــلب عنــك ما ســلا
رغم عسرات الليـالي والظروف

لا خطر ع البال ذكرك .. ياهلا
ياهلابك ياهوى بالي .. الووف

كني اشرب كيــف واقدع لي حلا
لا تخيلتك وانـــا اصـب الحروف

وش بقى لي فيـــك يا سيـد الملا
غير طاري ذكـريـاتك والطيـوف

انت لك فــي الحـب عهـداً وا ولا
ومواثيقاً على العهـــد وحلووف

كيف ينسى العهـــد قلبـــاً مبتلى
ما هوى غيرك ولا عينه تشوف

لا و لا لا .. ياحبيبي والـف .. لا
لن اخونك والوفــا طبعـي فأوف



عبدالله الشغيبي






.

.



هاض الغـرام وغصب عني تكلمت
سر الهـــوى ما كــان ودي يشاعي

يااللي رميت برمـش عيـنــك تاثمت
الرمش جــــارح والخفوق اندفاعي

ياليتني بعيــــونها الســـــود ماعمت
لقيتني ثامــل وانـــا اقـول .. واعي

امسيت في شـــط اللواحـظ وخيمت
واصبحت ادور لي بسـاعة ضياعي

رشفت من خمر الهدب لين حرمت
افــل في بحــــر النواعـس شراعي

يا رمشــها اللي بالمعــاليق سلهمت
ماني على غــارات حربك شجاعي

سلمت لك سيفـــي ودرعي وسلمت
قلبي بميــــدان العيـــــون الوساعي

نثرت جـــرح ٍ فيه عــــامين لملمت
واشعـلت نــيرانه وقـلت الـــوداعي

رحلــت يــــوم اني لقـــربك تولمت
اقفت ركــابك والمشــــاعر جياعي

اليـــــوم لا نامت عيـــــوني تحلمت
ويمرني طيفــك ليـــا صرت واعي

لو للهـــوى قاضي شكيت وتظلمت
والله .. لــثبـت فـ القـضيـه واداعي



عبدالله الشغيبي





.

.



حبيبتي ماشوف لك في البشر نــد
يا سلوة القلـب ومنـاه ونشيـده

من يوم رمشك صوب القلب وارتد
ركـز نياشينـه و طيّـح شهيـده

من يومها والغيـد ماعدّهـم عـد
انتي بقلبـي ياهـواه الوحيـده

اثرالعيون السود فـي هزلهن جـد
راحت ضحاياهن قلوبـن عديـده

ياللي بوجناتك نبت زاهـي الـورد
وبثغرك الساحـر لآآلـىء فريـده

حبك تملكني من الحـد الـي الحـد
يا مقتبل عمر الفرح يـا فقيـده

حب (ن) لجى بالروح ينزل ويصعد
يامر على قلبـي ويسكـن وريـده

اشقى لقربك واهتني فيـه واسعـد
لانك من اسباب الحيـاه السعيـده

وان غاب زولك غربتي مالها غـد
الفـكر تـايه والهــواجـس شريده

ارحل عن الواقـع بذكـراك وابعـد
واذكر معــانــات الســنين المديده

ولاصار بعـدك نـار بالقلـب توقـد
وشلون اعيش العمر وانتي بعيـده

زوّد عذاب الحب ياصاحبي زد
ان كان هـــذا شي يرضيك زيده

ترى عذاب البعد والهجـر والصـد
ماله علاج ولا وطبيب (ن)يفيـده

واللي سلب عقله هوى باهي الخـد
امـا طرحـه الحـظ والا يشــيـده

بالذات لامنه عشـق مايـس القـد
ضبين زعيم الريم مدري عقــيده

كذا جمـال الغيـد سحـره مؤكـد
يسلب عقول اهل العقـول الرشيـده

اذكر بمرّه والغلا صادق الوعد
لحظة لقــــانــا والمشــاعر وقيــده

تقـول اخـاف ان الامانـي تبـدد
والصبر من عنــدك يبيّـح رصيـده

قلت الزمن لوطال ماننقض العهد
والله يجــــازي كـل خايـن بكـيـده

قالت نشوف الحظ واحلامنـا ضـد
نحلـم ولا يتحـقـق اللـي نريـــده

قلت العفو من حكمة الصبـر لابـد
زرع الغــلابالصبر نجني حصيده

وما دامنـا قلبيـن يجمعهـم الـود
نصبر على جور الظروف العنيـده

البارحه جرح الهـوى بيـّح السـد
على جناح القـاف وصّـل بريـده

هاجس سرى يبرق خياله ويرعـد
ترجم على متن القوافي قصيـده



عبدالله الشغيبي





.

.



ياوليـف الروح قلبـــي ما نســــاك
مستحيل انساك يا الطرف الكحيل

يمكن انسى كل شــي الا غـــلاك
لا نسيته ضــاع فكــري والدليــل

انت مثل المــا بعين اللي ضماك
ضامي وعينه بعــــذب السلسبيل

وانت مثل الشهد جاعك واغتذاك
قلبي اللي مـا رضى غيرك بديل

وانت قمـه ربي اعلـــى مستواك
بالشـرف والعـز والخــلق النبيل

بالحــلا ما فيــه مثللك في حلاك
انت فوق الوصف مهما فيك قيل

صــورك ربي على هيئة مـلاك
يا خشـوف ٍ بالحســن ماله مثيل

الهوى لا هـب نــوده واقتـــواك
انثني غصـنك مــع الغربي يميل

وابتسم ورد الخـزامى من رباك
وانتشى صدر السما برق ومخيل

من ضياك الشمس تشرق من ضياك
واستعـار البــدر من ضيّـك قليل

وحدي الموعود في لحظة صفاك
لين نورك غاب مااشفيت الغليل

ارتشفت العشق من خمرة شفاك
وانتهيت بعـــــــالم احزاني عليل

رغم عثرات الامـاني في خطاك
وانتحـار الحلم و الجرح الجميل

ما خمــد جرحي ولا دمّه عفاك
كل ما تطري له الذكــرى يسيل

واصعب الاوقات في ذكرى هواك
انحدار الدمع ساعـــات الاصيل

بالخفوق اجيـــاد خيلن في فلاك
غايره بالشوق يسبقـها الصهيل

والفكر طيرن يحلق في فضاك
هايمن ماطــاب ليـــله والمقيـل

ماسواك اشقى خفوقي ماسواك
فضّلك من بـــد خلق الله خليل

باع كل النـاس لجـلك واشتراك
وانت تدرى بالعطـا ماهو بخيل

كم ضناه الشوق في رجوى لقاك
والأماني شمعة الليــــل الطويل

كم هزم جنح الليالي في رضاك
كم على شانك تحدى المستحيل

سايق ن روحه على كف الهلاك
والخطر حـــده كما حد الصقيل

وش تكون الروح لو راحت فداك
فدوة الرمشـــــين والخد الاسيل

اهـ من حظ ن تعـــثر بي معاك
كل مـا عدلت ميـــــلاته .. يميل

بعــدما عـانق سنـا برقي سماك
انقطع حبل المواصــل بالرحيل



عبدالله الشغيبي




.

.


يا عنـود الصيـد ربي لا يبيـحك
ليه سديت الطـريق المسفهله

ما علي ان كان هذا شي يريحك
بس عيب اللي يزعل صاحبن له

والله اني مانهزم لـوني جريحـك
ووالله انه ما انحنى الراس لمذله

لا تحيقرني ..ولا تكثر مديحك
روح في دربك وانا دربي وادلـه

بكرة الأيـام تظـهـر من يزيحك
عن منصات الخفوق المستـحله

ما نبي وردك وريحانك وشيحـك
دام طبع الكبر في نفسـك جبـله

اعرف المغرور حتى لو تضيحك
لو تضيحـك علته في النفس عله


عبدالله الشغيبي




.

.



على الموعد خفوقي طــير وسنين العنا ملواح
افــارق هم بعـدك والفـرح والشــوق جنحـاني

تذكر.. يوم جيتك والمشـاعر عطـرهـــا فـواح
اقدمهـا هديـه وانتظـر للـرد.. وش جـــــــاني

لقيت الــرد طعنـه سـربلت دم الخفـوق وساح
وماتت كلمة احبك وهي تصــرخ على لسـاني

قتلت الحلم في ليلة زفـافه وانتهت الافــراح
وانا اللي ناذرن عمري لهـ الليله ولا امداني

وش اللي صار في قلبك وخابرها القلوب صحاح
مصيركـ للزمــان اللي على المكتـوب وداني

توسد قلبي المحطوب يا جرح الزمن وارتاح
ترى مالك طبيب ولا علاج ٍ طول الازماني

وانا لا قلت بنسى سيرة الهم الذي ما انزاح
وقف شيـخ الغـلا يبكي بصـدري لين بكـاني


عبدالله الشغيبي





.

.





ليه تطــــــرين الالم ....دام انتي في عيــــوني .......منيتي حبي وضنــــوني .....ليــه تطــــــرين الالم

ليه يا اجمــــــــــــل اسم......ضنّك الجــــــــــــارح اثم .......وان دعى الامـــــــــــر ولزم

اسالي الجــرح بغيابكـ ...... أسالي الليــــل وعذابك ......واسالي طيــفن سرابك ....كلما اتذكـــــرك جابك

واسالي وجـــــدان شاعر ... لا ذرف دمــــــــع المشاعر......هل انا عمـــــري نسيتك .....وهل انا فعـــــــلا جفيتك

مستحيل ..مستحـــــيل .......ودام هذا مستحــــــــيل.....ليه تطــــــــرين الالم ......... ليه يا اجمـــــــــــل اسم

خايفه افقـــــد غلاك .......كيف انــــا بنسى هواك ......وانتي بعيـــــوني ملاك ......وما مــــــــلا عيني سواك

مستـــحيل ..مستحيل ......مستـــحيل انسى حياتي ......وانسى اجمــــل ذكرياتي .......وانتـــي مزروعه بذااتي....مستحــــيل !

لويفرقنــــا .. القـــــدر ....... وازرق الدمـــع انحدر .........لو مضى عمـــــري هدر ..... مانسيتـــــكـ .

يا بعــد قلبـي وعيـوني ..... اسالي الشــوق وشجوني .....عن مدى حبي وجنـــوني ....ومن عيـــونك صوبوني

مانسيتـــــــكـ . مانسيتــــــــكـ .



عبدالله الشغيبي




.

.




بيتين وصلتني للرد عليها فاعجبتني القافيه وكملت قصيده


يمكن ليا شفتك نزح همي شوي
ويمكن ليا شفتك جروحي تدارى

والا انت تدري انك النور والفي
وانك يمين ودرب وغيرك يسارى



الرد

يا عازف اوتار الهوى عزفكم شي
تطرب له اسماع القلوب الحيارى

ارجوك لا تجرح وانا خافقي عي
انا دخيل الناعسات الســكارى

تعبت في درب الهوى رايح وجي
الهم وايامي بنفس المسارى

الايام تطويني بدوراتها طي
يومي هجير وطال ليل السهارى

تحرقني الرمضه وانا اطارد المي
اثره سراب ليا لحقته توارى

لي جادل ٍ ماقد نهج منهج الغي
اقفى وانا عيني تهل العبارى

في غيبته لا ني بميت ولا حي
سبة جروح ٍ في الضماير تبارى

بالحسن ما مثله ولا زيه الزي
ضبي ٍ فريد الحسن سيد العذارى

طبعه خجول وصادق العهد وافي
والطيب له في كل موقف شعارى

لو بعتذر عن حبه العذر واهي
وان قلت بنساه المشاعر تمارى

اشتاق له شوق المحابيس للضي
واحن له حن القلوب الفطارا

ترف ٍ على ما راد يامر وينهي
يخطي على قلبي بدون اعتذارى

الي متى بصبر على البعد وارجي
ما عاد لي بالصبر زود اقتدارى

اما معه تسعد حظوظي وتصفي
والا بلاش من الحظوظ الفقارى

انا ادري ان الحظ طايح ومعمي
ما عمر هذا الحظ جاب انتصارى



عبدالله الشغيبي





.

.



يـا خـاينـه كـل المواثـيـق وش صــار
مــن علـمـك فــن الخـيـانـه وجــراك

عيـب ٍ عليـك الـلـي تسويـنـه وعــار
لا صنتـي احبابـك ولا شخـص ربـاك

من هـو لعـب لـك لعبـة القـط والفـار
حتـى دنـى راسـك ودنسـك واغــواك

مـا لـك وفـاء قلبـك مـع الكـل يـنـدار
مـغـروره بحسـنـك وتهـتـي بـدنـيـاك

قلبـك شـقـق لـلـي يــدور لــه ايـجـار
حسيـبـك الله خـافـي الـنــار تـصــلاك

يابـوالعيـون الناعسـه خبـث واسـرار
تجـرح بهـا العاشـق وتخفـي نوايـاك

لاتعتـذر مـا اقبـل خداعـك و الاعـذار
بانـت لـي اطبـاعـك وبـانـت خفـايـاك

لا تعـتـذر وتـقـول تصـريـف الاقــدار
وانـت الــذي بالـغـدر مـديـت يمـنـاك

وانـا اللـي اهديتـك مـن الغربه اشعـار
واهديـت لــك قـلـبٍ يحـبـك ويـهـواك

يامـا علـى شـانـك تحـديـت الاخـطـار
وياماعلـى شانـك تخطيـت الاشــواك

ويـامـا عـلـى حـيّـك تعنّـيـت مـشـوار
شفق ٍ علـى شوفتـك واسعـد بلامـاك

اول ريـاض القلـب تنبـت لـك ازهـار
واشعـلتـ نـيران الخيــانه بــلا ادراك

اول دموعـك كـل مـا ابطيـت مــدرار
واليوم يـا دمـع التماسيـح مـا ابغــاك

اول جنون الحـب تحجـب لـي انظـار
واليـوم عـن عينـي تجـلـت خطـايـاك

خلك علـى طبعـك تـرى الوقـت دوار
لابــد مــا تبـكـي نــدم مــن سـوايـاك

جيتـك فـي الميـدان فـارس ومـغـوار
غدرت بي واسكنت فـ القلب شلفاك

جيتـك خبيـر الـعـوم فــارس وبـحـار
اثرك شبيه المـوج مفقـود مـن جـاك

قصـر ٍ بنيـتـه بـالامـل فجـئـه انـهـار
يا قلب لا ترفع علـى الجـرف مبنـاك

واللي حصـل كبـوة جـواد ٍ بمضمـار
لو صرت يابحر الهوى من ضحاياك

مانـي بندمـان ٍ عـلـى بـعـد الاشــرار
الله يـعـوضـنـي ويـاســعـد فـرقـــاك

لان الخيـانـه طـبـع فــي كــل غــدار
عـيـنـه علـى هــذا وقـلبــه مـع ذاك



عبدالله الشغيبي




.

.


علـى دروب الهـوى ياشــوق ودينـي
كم من سنــين ٍ عليـها السـاق سريتـه

اسري واجـر اللحـون اللـي تسليني
من فيـض همـن عن العــذال داريتـه

يهل الهوى شرعنـا شـرع المجانيني
يالـيـتـنـي مــا تعـلمـتـه ولا اوحـيـتـه

ياليتنـي مـا هـويـتـك يريـش العيـنـي
ولا علـى شانـك اغـلا الدمـع هليتـه

العـام شـوفـك لـيـا مـريـت يشفيـنـي
مـن زود حبـي لـذاك الـحـي حليـتـه

العـام مـن بـد كـل الـنـاس شاريـنـي
تفـرح بشوفـي وتـزعـل لا تباطيـتـه

تبـكـي وتحـلـف بربكـ مــا تخليـني
لـو يوقـف العالـم ابوجهـك تحديـتـه

العام من حالـي المشـروب تروينـي
واليـوم بيــدك مرار الـكاس عليـتـه

اليوم لو فـي يديـك المـوت تسقينـي
ما كني اللـي برمـش العيـن غطيتـه

اليـوم مـات الـخزامـى في بسـاتيني
احرقت غرس الغلا والشمع طفيتـه

غيّـرت طبـع المــوده يـا مجافيـنـي
تجـفـى وليـفـك بــلا ذنــب ٍ تجنيـتـه

تـرى سـلاح الـغدر بـيـد المحبيـنـي
تجرح وياخذ بثـاري شخـص حبيتـه



عبدالله الشغيبي




.